سعودی حکومت نے ریاض میں متعین لبنانی سفیر کو آئندہ 48 گھنٹوں کے اندر ملک چھوڑنے کا حکم دے دیا۔

العربیہ ڈاٹ نیٹ کے مطابق لبنان میں متعین سعودی سفیر کو مشاورت کےلئے واپس بلا لیا ہے اور سعودی عرب نے لبنان سے آنے والی تمام درآمدات بھی روک دی ہیں۔

سعودی عرب کی جانب سے آنے والے بیان میں کہا گیا کہ مملکت اور اپنے عوام کی حفاظت کےلئے تمام ضروری اقدامات اٹھانےکی اہمیت کے پیش نظر مملکت میں لبنان کی تمام درآمدات کو روکنے کا فیصلہ کیا گیا۔

یہ فیصلے لبنانی وزیر اطلاعات کی طرف سے سعودی عرب کے خلاف جارحانہ بیانات کے بعد کیے گئے ہیں۔

سعودی عرب نے لبنانی وزیر خارجہ کے بیانات کی شدید مذمت کرتے ہوئے ان کے تمام دعوے بے بنیاد قرار دے کر مسترد کر دیے۔

سعودی عرب کا کہنا ہے کہ لبنانی حکومتی عہدیداروں کی طرف سے مملکت پر عائد کردہ تمام الزامات بے بنیاد اور من گھڑت ہیں۔

لبنان اور سعودی عرب کے درمیان تازہ کشیدگی ایک ایسے وقت میں آئی ہے جب سعودی عرب نے متعدد بار لبنانی حکومت سے سعودی عرب میں منشیات کی اسمگلنگ کی روک تھام کےلئے موثر اقدامات کا مطالبہ کیا ہے۔