وفاقی وزیر داخلہ شیخ رشید کہتے ہیں کہ مریم نواز حساس اداروں کے خلاف اشتعال انگیز بیان دے رہی ہیں۔اداروں کے خلاف بولنے والے اپنے لئے مسائل پیدا کر رہے ہیں۔ویکسینیشن کے خلاف سازشیں ملک کی بدنامی کا باعث بن رہی ہیں۔

لاہورمیں پریس کانفرنس کرتے ہوئے وفاقی وزیر داخلہ شیخ رشید نے مریم نواز کو شدید تنقید کا نشانہ بناتے ہوئے کہا حساس ادارے کےخلاف بیان دینے والے کسی اور کا کام کر رہے ہیں۔فوج جمہوریت کے ساتھ کھڑی ہے، اس کے خلاف بیان دینے والے غیر ذمہ داری کا ثبوت دے رہے ہیں۔

وفاقی وزیر داخلہ کا کہنا تھا کہ آنے والے الیکشن میں وہ ایک نئی الائنمنٹ دیکھ رہے ہیں، تاہم نواز شریف کی ٹرین چھوٹ چکی ہے.شہباز شریف کے کئے کرائے پر مریم نواز جھاڑو پھیر دیتی ہیں۔

ویکسین کے جعلی اندراج کے واقعات کو سازش قرار دیتے ہوئے وزیر داخلہ کاکہناتھا این سی او سی بہترین کام کر رہی ہے۔ ویکسینیشن کو مشکوک کر کے ملک کو دنیا بھر میں بدنام کیا جارہا ہے۔