اسلام آباد:وزیر خارجہ شاہ محمود قریشی نے کہا ہے کہ افغانستان میں ہمیں امن مخالف عناصر پر کڑی نظر رکھنا ہوگی،افغانستان سے نکلنے والے افراد کو محفوظ راستہ دیں گے۔

افغان رہنماؤں کا اعلیٰ وفد وزارتِ خارجہ پہنچا اور وزیر خارجہ مخدوم شاہ محمود قریشی سے ملاقات کی جس میں افغانستان کی صورتحال کے حوالے سے تبادلہ خیال کیا گیا۔

ملاقات کے بعد میڈیا سے گفتگو کرتے ہوئے شاہ محمود قریشی نے کہا کہ افغانستان کی بدلتی صورتحال پر افغان وفد سے مشاورت کی گئی۔

وزیرخارجہ شاہ محمود قریشی کا کہنا تھا کہ افغانستان سے متعلق پاکستان کی پوزیشن واضح ہے، پاکستان افغانستان کے لوگوں کی ترقی کا خواہاں ہے۔

شاہ محمود قریشی نے مزید کہا کہ ہمیں آنے والے وقتوں میں امن مخالف عناصرپرکڑی نظررکھنا ہوگی جس پر وزیراعظم نے آج قومی سلامتی کا خصوصی اجلاس بھی طلب کیا ہے۔

وزیرخارجہ شاہ محمودقریشی نے افغان وفد کے بارے میں بتایا کہ وفد میں مختلف مکتبہ فکر کے لوگ شامل ہیں۔

وزیر خارجہ نےمزید بتایا کہ ڈنمارک کے وزیرخارجہ سے بات ہوئی ہے، ڈنمارک کے لوگوں کا افغانستان سے محفوظ انخلا ہوچکا جبکہ پاکستان مزید پروازیں افغانستان بھیجنے کی کوشش کررہا ہے۔ افغانستان سے 380 غیر ملکی سفارتکار پاکستان پہنچ چکے ہیں۔

شاہ محمود قریشی نے کہا کہ افغانستان میں افراتقری کا خاتمہ چاہتے ہیں اور لوگوں کی جان اور مال کی حفاظت ضروری ہے۔