وزیراعظم عمران خان کہتے ہیں انضمام شدہ علاقوں کی عوام نے ملک کےلئے بے پناہ قربانیاں دی ہیں جن کو ہم انتہائی قدر کرتے ہیں۔

وزیرِ اعظم عمران خان کی زیرصدارت اجلاس میں انضمام شدہ علاقوں میں جاری ترقیاتی سرگرمیوں کا جائزہ لیاگیا۔اجلاس میں وفاقی وزرا شوکت ترین، اسد عمر، وزیرِ اعلیٰ خیبرپختونخواہ محمود خان، معاونین خصوصی شہباز گل،وقار مسعود، وزیرِ خزانہ کے پی تیمور سلیم جھگڑا اور دیگر سینئر افسران نے شرکت کی۔

اجلاس کو بتایا گیا کہ وفاق کی جانب سے اس وقت 4فیصد کے اعتبار سے ادائیگیاں کی جا رہی ہیں۔وفاق کی جانب سے سابقہ قبائلی علاقوں کی عوام سے کیے گئے وعدوں کو مکمل طور پر پورا کیا جارہا ہے۔

اس موقع پر وزیراعظم کا کہنا تھا کہ انضمام شدہ علاقوں کی تعمیر و ترقی موجودہ حکومت کی اولین ترجیح ہے۔

وزیرِاعظم نے صوبوں پر زور دیا کہ انضمام شدہ علاقوں کی تعمیر و ترقی کے لئے کیے گئے وعدے کی تکمیل کے حوالے سے صوبے اپنا حصہ ڈالیں تاکہ تعمیر و ترقی کے عمل کو مزید مستحکم کیا جا سکے۔