وزیراعظم عمران خان کی زیر صدارت اجلاس میں راوی اربن سٹی اور سینٹرل بزنس ڈسٹرکٹ منصوبےکی پیشرفت پر بریفنگ دی گئی۔ وزیراعظم نے پانی کی کمی کو پورا کرنے اور واٹر ٹریٹمنٹ پلانٹس کے لئے جدید ٹیکنالوجی کا استعمال ناگزیر قرار دیا۔

وزیرِاعظم عمران خان کی زیر صدارت راوی اربن سٹی اورسینٹرل بزنس ڈسٹرکٹ منصوبےکی پیشرفت کے حوالے سےاجلاس ہواجس میں وزیر خزانہ شوکت ترین، معاون خصوصی شہباز گل، چیئرمین نیا پاکستان ہاؤسنگ اتھارٹی انور علی حیدر اور دیگر افسران نے شرکت کی۔

اجلاس میں دونوں کلیدی منصوبوں میں ہونے والی پیشرفت پر تفصیلی بریفنگ دی گئی۔بتایا گیا کہ انڈسٹریل زون کے حوالے سے منظوری کا عمل بھی جون میں مکمل ہو جائے گا۔جس کے بعد انفراسٹرکچر کی تعمیر کا کام شروع کر دیا جائے گا۔راوی سٹی میں واسا کے تین واٹر ٹریٹمنٹ پلانٹس کی منتقلی اور ویسٹ واٹر ٹریٹمنٹ کے لئے جدید ٹیکنالوجی کے استعمال پر بھی بریفنگ دی گئی۔

وزیراعظم نے پانی کی کمی اور خصوصا ًلاہور جیسے بڑے شہروں میں ویسٹ واٹر ٹریٹمنٹ پلانٹ کی اہمیت پر زور دیتے ہوئے کہا کہ پانی کی کمی کو پورا کرنے اور واٹر ٹریٹمنٹ پلانٹس کے لئے جدید ٹیکنالوجی کا استعمال ناگزیر ہے۔

انہوں نے واٹر ٹریٹمنٹ اور ویسٹ واٹر ڈسپوزل کےضمن میں ایک مربوط اور جامع حکمت عملی مرتب کرنے کی ہدایت دی۔