وزیرِ اعظم عمران خان نے اکنامک ایڈوائزی کونسل کو ہدایت کرتے ہوئے کہا ہے کہ عوام پر مزید ٹیکس لگانے کے بجائے انہیں ریلیف فراہم کرنے کےلئے آؤٹ آف باکس سلوشنزتجویز کیے جائیں۔معاشی استحکام و پائیدارگروتھ کےلئےروڈ میپ پیش کیاجائے۔ٹیکسز کے نظام میں اصلاحات حکومت کی اولین ترجیحات میں شامل ہے۔

وزیرِاعظم عمران خان نے ویڈیو لنک کےزریعے اکنامک ایڈوائزی کونسل کے اجلاس کی صدارت کی۔

وزیرِ اعظم نے تمام ممبران کو کونسل میں خوش آمدید کرتے ہوئے وزیر خزانہ کو کونسل کی مکمل طور پر فعالی کو یقینی بنانے کی ہدایت کی۔

وزیرِاعظم نےکہا کہ اکنامک ایڈوائرزی کونسل کےقیام کا مقصد ملکی معیشت کو پائیدار بنیادوں پر استوار کرنے کے حوالے سے نامور معاشی ماہرین کی تجاویز سے استفادہ کرنا ہے۔

عمران خان کاکہنا تھا کہ حکومتی کوششوں کی بدولت کاروباری فضا بہتر ہوئی اور کاروباری برادری کا اعتماد بحال ہوا ہے۔ حکومت کی ہر ممکنہ کوشش رہی ہے کہ بزنس کمیونٹی کی مشاورت سے نہ صرف پالیسیاں تشکیل دی جائیں بلکہ ان پالیسیوں کا تسلسل یقینی بنایا جائے۔

وزیراعظم نے کہا کہ پائیدار معاشی استحکام و ترقی کے حوالے سے قلیل المدت، وسط مدتی اور کثیر المدتی اقدامات پر مبنی روڈ میپ تجویز کیا جائے تاکہ معیشت کے اہم شعبوں کو مزید منظم کیا جا سکے۔