گورنربلوچستان آمان اللہ خان یاسین زئی نے کہا ہے کہ چینی سفارت خانہ کی جانب سے صوبہ بلوچستان کے محنت کش اور غریب عوام کیلئے رمضان المبارک کے موقع پر اس سال بھی اشیاء خوردنوش کا عطیہ فراہم کرنا نہ صرف پاک چائنا کی گہری دوستی کی علامت ہے بلکہ بشر دوستى کی ایک اعلیٰ مثال بھی ہے. چائنا نے ہر مشکل میں پاکستان کے ساتھ نبھایا ہے.

گورنرہاوس کوئٹہ میں چینی سفیر مسٹر نورنگ اورقونصل جنرل چائینا مسٹر لی بی جان کے ہمراہ تقریب سے خطاب کرتے ہوئے گورنر بلوچستان جسٹس ریٹائرڈ امان اللہ یاسن زئی کا کہنا تھا کہ خیرسگالی کے تحت فراہم کیا گیا امدادی سامان کے حوالے سے ہم چین سفیر اور پوری چائنیز قوم کا خصوصی طور پر شکریہ ادا کرتے ہیں اور انکی معاونت کو قدر کی نگاہ سے دیکھتے ہیں۔

اس موقع پر پاکستان میں تعینات چین کے سفیر (Mr. Nong Rong) اور چینی قونصل جنرل (Mr. Li Bijian) سمیت پی ٹی آئی کے مشیر برائے پاک چین تعاون بایزید خان کاسی بھی موجود تھے۔

واضح رہے کہ چینی سفارت خانے کی جانب سے فراہم کردہ راشن پیکٹس میں اشیاء خوردونوش اور ضروری سامان شامل ہیں۔ گورنر بلوچستان کی درخواست پر چینی سفارت خانے نے صوبے کے چھ مختلف اضلاع سے تعلق رکھنے والے سترہ سو خاندانوں کیلئے اشیاء خورد نوش مہیا کی ہے۔

گورنر بلوچستان نے ضلع کوئٹہ کیلئے عطیات کی تقسیم گورنر ہاؤس کوئٹہ میں خود کیا جبکہ بقیہ پانچ اضلاع میں ہر ضلع کا متعلقہ رکن صوبائی اسمبلی ضلع کے ڈپٹی کمشنر کے ساتھ ملکر مستحق خاندانوں میں اشیاء خورد نوش تقسیم کریں گے۔ بعدازاں چائنیز سفیر نے پاک چین دوستی کی ستر برس دوستی کے حوالے سے گورنر ہاوس کوئٹہ کے احاطے میں کوئٹہ پائن کا درخت بھی لگایا۔