وزیرخارجہ شاہ محمود قریشی کہتے ہیں کہ وزیراعظم کسی سے بلیک میل نہیں ہوں گے، اگر کسی نے کچھ غلط کیا تو بھگتنا پڑے گا۔

شاہ محمود قریشی نے کہا کہ جہانگیر ترین کی مل کے خلاف کارروائی کی بات درست نہیں، بندے لے کر عدالت جانا کسی طور مناسب نہیں، مریم لے جائیں تو غلط، ہم لے جائیں تو کیا مناسب ہے؟

ملتان میں میڈیا سے گفتگو میں وزیر خارجہ نے کہا کہ پی ڈی ایم بغلیں نہ بجائیں، ناراض اراکین نے فارورڈ بلاک مسترد کردیا، پارٹی کی باتیں پارٹی کے اندر ہوتی ہیں، باہر بات کرنا مناسب نہیں۔ پارٹی چھوڑنے کا ایک طریقہ کار ہے۔

شاہ محمود قریشی نے مزید کہا کہ انہوں نے کسی جماعت میں جانے کومسترد کردیا، کوئی جانا چاہے تو اسے پارٹی چھوڑنا ہوگی۔

ان کا مزید کہنا تھا کہ عمران خان انتقامی کارروائی پر یقین نہیں رکھتے، کسی ایک گروپ کے خلاف اقدام نہیں اٹھایا گیا، سترہ شوگر ملز کے خلاف کارروائی ہوئی، ان ملز میں ایک ملز ترین صاحب کی بھی ہے، ترین صاحب نے کچھ نہیں کیا تو بری ہوں گے۔