بولی وڈ کے ماضی کی مشہور ترین اداکارہ ہیما مالنی نے کہا ہے کہ جب وہ فلموں میں کام کرتی تھیں اور شوٹنگ کے لیے آتی تھیں تو ان کے ساتھ ان کے والد ہوا کرتے تھے۔ اس صورتحال کی وجہ سے وہ اور دھرم جی (دھرمیندر) ایک ساتھ زیادہ وقت نہیں گزار پاتے تھے۔

انڈین آئیڈل 12 میں تقریب کے دوران انکشاف کرتے ہوئے ہیما مالنی کا کہنا تھا کہ جب کسی گانے کی شوٹنگ ہوتی تھی تو اس شوٹ کے لیے بالخصوص ان کے والد ساتھ ہوا کرتے تھے، جس کی وجہ سے وہ اور دھرمیندر تنہائی میں اکٹھے وقت نہیں گزار پاتے تھے۔

انہوں نے مزید بتایا کہ عموماً ویسے تو شوٹنگ پر میری والدہ یا آنٹی میرے ساتھ ہوا کرتی تھیں، لیکن ایک گانے کی شوٹنگ کے دوران میرے والد میرے ساتھ تھے، اور وہ یہ بات پسند نہیں کرتے تھے کہ میں اور دھرم جی تنہائی میں کچھ وقت گزاریں کیونکہ انہیں معلوم تھا کہ ہم دونوں میں دوستی ہے۔

مجھے یاد ہے کہ جب ہم کار میں سفر کرتے تھے تو میرے والد بالکل میری برابر والی سیٹ پر بیٹھا کرتے تھے، اور دھرم جی دوسری سیٹ پر ہوجایا کرتے تھے۔