ایوان بالا میں اپوزیشن آگ بگولہ ہوگئی اور نیب کارروائیوں پر خوب شور شرابہ ہوا۔ سینیٹ اجلاس میں ڈپٹی چیئرمین سینیٹ نےمعاملہ اٹھادیا۔ سلیم مانڈوی والا نے کہا کہ ہمارےاثاثے دیکھنے میں تو یہ بہت استاد ہیں۔ نیب کے اثاثے کون چیک کرے گا؟ جب تک نیب والے اپنے اثاثے ڈکلیئر نہیں کریں گے۔یہ جدوجہد جاری رہے گی۔

سلیم مانڈوی والا کا کہنا تھا کہ ملک میں کسی کا اکاؤنٹ محفوظ نہیں۔ ہر ہفتے نیب متاثرین کو پارلیمنٹ اور چیمبر بلاؤں گا۔

سلیم مانڈوی والا نے سوال پوچھا کہ چیئرمین نیب کو کون بلیک ملیل کررہا ہے وہ سینیٹ آکر بتائیں۔

سلیم مانڈوی والا کےمطالبات پر بابراعوان نے کہا اصلاحات یا مذاکرات کیلیے تیار ہیں۔ لیکن کسی فورم پر این آر او نہیں ملےگا۔

انہوں نے مزید کہا کہ احتساب کے ادارے کے دروازے پرتالا نہیں ڈال سکتے ، کیسزکے شکار افراد کوعدالت میں سرینڈرکرنا ہوگا۔

سراج الحق نے کہا نیب کا قانون پرانی حکومتوں نے بنایا آج سب اسی میں پھنس گئے۔

وفاقی وزیرعمرایوب کے آصف زرداری کو مسٹر ٹین پرسنٹ کہنے پر پیپلزپارٹی نے ایوان میں شدید احتجاج بھی کیا۔