ماؤنٹ منگنوئی: قومی کرکٹ ٹیم کے مڈل آرڈر بلے باز فواد عالم نے 11 سال بعد ٹیسٹ کرکٹ میں سنچری داغ دی۔ وہ پاکستان کی جانب سے کیویز کیخلاف کھیلا گیا پہلا ٹیسٹ تو نہ بچا سکے لیکن سب کے دل ضرور جیت لئے۔

فواد عالم کی نیوزی لینڈ کیخلاف میچ کی چوتھی اننگز میں شاندار سنچری، سوشل میڈیا پر تعریفوں کی بھرمار ہوگئی اور فواد عالم کا نام سوشل ميڈيا پر ٹاپ ٹرينڈ ميں شامل ہوگیا۔

قومی کرکٹ ٹیم کے سابق کپتان راشد لطیف نے ٹویٹ کرتے ہوئے لکھا کہ فواد عالم کی تکنيک سادی ہے۔۔ ديکھو پہلے۔۔۔ کھيلو بعد ميں۔۔۔

کرکٹر ياسرعرفات اور ويمنز کرکٹر کائنات امتياز نے بھی فواد عالم کی خوب تعريف کی جبکہ قومی ویمنز ٹیم کی سابق کپتان ثناء مير نے فائٹنگ اننگز قرار ديا۔

سابق کيوی کرکٹر گرانٹ ايليٹ بھی فواد کے گن گانے لگے۔

اس کے علاوہ آئی سی سی اور کرکٹ آسٹریلیا بھی میدان میں آئے، فواد کی 2009 اور 2020 میں سنچریوں کی تصاویر شیئر کیں اور لکھا کہ کبھی ہار نہ مانیں، صبر کرنے والوں کو پھل بھی اچھا ملتا ہے۔

کسی نے لکھا کہ صبر کا پھل میٹھا ہوتا ہے تو کسی نے فواد عالم کی شاندار اننگز کو ڈومیسٹک کرکٹ کا ثمر قرار دیا۔