دو طرفہ تعلقات کے معمول پرآنے کے معاہدے کے بعد متحدہ عرب امارات سے اسرائیل کو پہلے اعلی سطحی دورے کے دائرہ کار میں دونوں ممالک کے بیچ ویزے کی بندش کے خاتمے سمیت 4 معاہدے طے پاگئے۔

غیر ملکی خبر رساں ادارے کے مطابق امریکی وزیر خزانہ اسٹیون منوچن اور وزیر اقتصادیات، متحدہ عرب کے وفد کے ہمراہ ابو ظہبی سے تل ابیب روانہ ہوئے۔

اسرائیلی وزیر اعظم بنیامین نتن یاہو نے امریکی اور متحدہ عرب امارات کے حکام کا ہوائی اڈے پر استقبال کیا۔

نتن یاہو نے اس موقع پر ابو ظہبی کے ساتھ طے پانے والے باہمی تعلقات کو معمول پر لانے کے معاہدے کے باعث امریکی صدر ڈونلڈٹرمپ اور متحدہ عرب امارات کے پرنس محمد بن زاید کا شکریہ اداکرتے ہوئے کہا کہ اگر امریکا کا تعاون حاصل نہ ہوتا تو آج ہم یہاں پر نہ ہوتے۔

بعد ازاں اسرائیل اور متحدہ عرب امارات کے مابین ویزے کی بندش کے خاتمے،ایوی ایشن، اقتصادی تعلقات تعاون اور سرمایہ کاری کے تحفظ پر مبنی 4 معاہدوں پر دستخط کیے گئے۔

متحدہ عرب امارات اسرائیل کے ویزے کی شرط ختم کرنے والا پہلا عرب ملک بن گیا.