ترکی کے شہرہ آفاق ڈرامہ سیریل ارطغرل غازی میں دوآن الپ کا کردار نبھانے والے ترک اداکار جاوید جیتن پاکستان پہنچ گئے۔

تفصیلات کے مطابق جاوید نے اسلام آباد پہنچنے پر اپنے انسٹاگرام سے 'فوک میوزیک' کی ویڈیو شیئر کی اور گڈ مارننگ کہا۔

جاوید جیتن اپنے اس دورے میں مداحوں سے ملاقات بھی کریں گے، انہوں نے بے حد محبت ملنے کے بعد پاکستان کو اپنا دوسرا گھر قرار دیا تھا۔

واضح رہے کہ وزیراعظم عمران خان کی خصوصی ہدایت پر اسلامی تاریخ پر مبنی ترکش ڈرامہ یکم رمضان المبارک سے پی ٹی وی پر اردو زبان میں ڈب کرکے نشر کیا جارہا ہے۔ اس ڈرامے کو نہ صرف عام پاکستانی ناظرین بلکہ کئی نامور شخصیات بھی خوب پسند کررہی ہیں۔