عموماً آئی فون میں پر ایسے پیغام سامنے آتے ہیں جو فون کے سسٹم کو کریش کردیتے ہیں، مگر اب اینڈرائیڈ صارفین کے لیے بھی ایسا ہی مسئلہ سامنے آیا ہے۔

ایک تصویر کو کسی بھی کمپنی کے اینڈرائیڈ فون میں وال پیپر کے طور پر استعمال کیا جائے تو ڈیوائس کام کرنا چھوڑ دیتی ہے۔

تاہم آئی فون کے میسج بگ کے برعکس اینڈرائیڈ فون اسی وقت متاثر ہوسکتے ہیں جب ان میں تصویر کو بطور وال پیپر استعمال کیا جائے گا۔

سام سنگ کے فونز کی تفصیلات لیک کرنے کے حوالے سے معروف ٹوئٹر صارف آئس یونیورس نے اتوار کو ایک ٹوئٹ میں صارفین کو خبردار کیا۔

WARNING！！！
Never set this picture as wallpaper, especially for Samsung mobile phone users!
It will cause your phone to crash!
Don't try it!
If someone sends you this picture, please ignore it. pic.twitter.com/rVbozJdhkL

— Ice universe (@UniverseIce) May 31, 2020

انہوں نے ایک تصویر کو پوسٹ کرتے ہوئے کہا کہ اس خوبصورت تصویر کو وال پیپر کے طور پر استعمال کرنے سے گریز کریں۔

اگر اس انتباہ کے باوجود آپ اس تصویر کو وال پیپر کے طور پر لگا کر دیکھنا چاہتے ہیں کہ اینڈرائیڈ فون پر کیا اثر ہوتا ہے تو پھر اسے دوبارہ استعمال کرنے کے لیے کچھ وقت انتظار کرنا پڑے گا۔

اینڈرائیڈ سینٹرل کے مطابق سورج غروب ہونے کی یہ تصویر کسی بھی اینڈرائیڈ فون کو کریش کرسکتی ہے کیونکہ اس میں ایک ایسا کوڈ چھپا ہے جو پورے اینڈرائیڈ سسٹم یوزر انٹرفیس کو کریش کردیتا ہے۔

اس تصویر کو براؤزر پر اوپن کرنے یا فون میں محفوظ کرنے سے کوئی فرق نہیں پڑتا، تاہم اگر اسے وال پیپر کے طور پر لگایا جائے تو فون متاثر ہوسکتا ہے۔

اس کے علاوہ تصویر میں کسی قسم کی ایڈیٹنگ کرکے بھی مسئلے کو ٹھیک کیا جاسکتا ہے اور پھر وال پیپر کے طور پر استعمال کیا جاسکتا ہے۔

تاہم جو صارف اصل تصویر کو وال پیپر کے لیے استعمال کرتا ہے تو اس بار بار کریش ہونے کے مسئلے سے بچنے کے لیے فون کو فیکٹری ری سیٹ کرنا پڑتا ہے یا سیف موڈ پر فون اوپن کرکے جلدی سے وال پیپر کو کسی اور سے بدلنا ہوگا۔