آئی ایم ایف کی مینجنگ ڈائریکٹر کرسٹالینا جارجیوا نے پاکستان سے متعلق اہم بیان جاری کردیا۔ ان کا کہنا ہے کہ پاکستان معاشی اصلاحات پر کاربند ہے، موجودہ حالات پاکستانی معیشت کیلئے چیلنجنگ ہیں۔

آئی ایم ایف نے وزیراعظم عمران خان کے انسداد کورونا ریلیف پیکج کو خوش آئند قرار دیتے ہوئے کہا ہے کہ اس ریلیف پیکج سے متاثرہ خاندانوں کو مدد مل سکے گی۔

ایم ڈی آئی ایم ایف کا کہنا ہے کہ پاکستان نے فوری فنڈز کا مطالبہ کیا ہے، پاکستان یہ فنڈ انسداد کورونا اور ریلیف سرگرمیوں کیلئے استعمال کرنا چاہتا ہے۔

ان کا کہنا ہے کہ امید ہے آئی ایم ایف بورڈ اس کی جلد منظوری دیدے گا، امید ہے پاکستان اصلاحات کے ذریعہ معاشی استحکام حاصل کرلے گا۔

کرسٹالینا جارجیوا نے مزید کہا کہ ریلیف اقدامات میں پاکستان کے ساتھ تعاون جاری رہے گا۔