بیجنگ: چین میں دوبارہ سے کورونا وائرس پھیلنے کے خدشے کا اظہار کیا گیا ہے۔

ملک میں کورونا وائرس کا ایک نیا کیس سامنے  آنے پر چینی ڈاکٹر کی جانب سے تنبیہ کی گئی ہے۔

سی این این کے مطابق کورونا وائرس سے متعلق بیجنگ کی ماہر ٹیم کی ممبر پروفیسر لی لنجوان نے کہا کہ وہ کورونا وائرس ایک بار پھر پھیلنے سے 'بہت پریشان' اور خوفزدہ ہیں۔

انہوں نے متنبہ کیا کہ درآمدی معاملات کی تعداد میں اضافے سے ایک بار پھر وبا پھیل سکتی ہے۔

انہوں نے گذشتہ روز رپورٹ ہونے والے نئے کیس کا ذکر کیا اور کہا کہ یہ شخص ترکی سے واپس آنے والی ایک خاتون سے ملا تھا، جس کے بعد خود بھی کورونا وائرس کا شکار ہوگیا۔

انہوں نے انتباہ کیا ہے کہ بیرون ملک سے آنے والوں لوگوں میں پائے جانے والے انفیکشن کی بڑھتی ہوئی تعداد کی وجہ سے قوم کو ایک بار پھر سے وبا کا سامنا کرنا پڑ سکتا ہے۔

انہوں نے مزید کہا کہ وہ بہت پریشان ہیں کیونکہ بیرون ملک سے آنے والے لوگوں کی وجہ سے ہمارے ملک میں نئے سرے سے بڑے پیمانے پر وبا پھیل سکتی ہے۔

چین میں یہ نیا کیس اس وقت رپورٹ ہوا جب کورونا وائرس کی وجہ سے تباہی کے دہانے پر پہنچنے والے شہر ووہان میں ایک بار پھر سے معمول کی زندگی بحال ہو رہی تھی۔

ان کا کہنا ہے کہ بیرون ملک سے آنے والے متاثرہ لوگوں سے نمٹنا بھی طبی عملے کے لیے مشکل کام ہے۔ اس صورتحال میں ہمیں اپنے شہروں میں اس وبا کو پھیلنے سے روکنے کے لیے اپنی کوششیں تیز کرنے اور انتھک کام کرنے کی ضرورت ہے۔

انہوں نے حکام سے مطالبہ کیا کہ ان لوگوں کی شناخت کریں جنہیں وائرس نے متاثر کیا تھا لیکن ان کی سرکاری طور پر تشخیص نہیں کی گئی ہے۔

واضح رہے کہ وسطی چین میں دو ماہ کے لاک ڈاؤن کے بعد معمولات زندگی بحال ہونے لگے۔ لوگوں کو پبلک ٹرسپورٹ کے استعمال اور دفاتر جانے کی اجازت دی جانے لگی ہے۔

پیر کو ووہان شہر میں پابندیوں میں نرمی اس وقت سامنے آئی جب چینی صحت کے عہدیداروں نے پیر کے روز مہلک وائرس کے کوئی نئے مقامی واقعات کی اطلاع نہیں دی، لیکن بیرون ملک سے آنے والے 39 دیگر افراد میں انفیکشن کی تصدیق کی گئی ہے۔

عہدیداروں نے بتایا کہ صحت مند سمجھے جانے والے ووہان کے رہائشی شہری گھوم پھرسکتے ہیں اور بس یا میٹرو لے سکتے ہیں جب تک وہ اپنے شناختی کارڈز دکھائیں گے۔ اگر ان کے آجر اجازت دیں تو وہ بھی کام پر واپس جاسکتے ہیں اور شہری صوبہ ہوبی کے آس پاس کے دیگر حصوں تک جانے کے لیے وائرس کا ٹیسٹ کروا کر صحت کا سرٹیفیکیٹ ملنے کے بعد شہر سے جا سکتے ہیں۔