لاہور: پاکستان سپر لیگ سیزن فائیو میں کراچی کنگز اور ملتان سلطانز کے درمیان کھیلا گیا لیگ کا 19 واں میچ بارش کے باعث منسوخ کردیا گیا۔ جس کے بعد دونوں ٹیموں کو ایک ایک پوائنٹ دے دیا گیا۔

کراچی کنگز کی دعوت پر لاہور کے قذافی اسٹیڈیم میں پہلے بیٹنگ کرتے ہوئے ملتان سلطانز نے 16 اعشاریہ 5 اوورز کے کھیل میں 6 وکٹوں کے نقصان پر 102 رنز اسکور کئے تھے تاہم بارش نے رنگ میں بھنگ ڈالا اور میچ کو بالآخر منسوخ کرنا پڑگیا۔

جس وقت میچ روکا گیا شاہد خان آفریدی 17 گیندوں پر 35 اور سہیل تنویر 18 گیندوں پر 10 رنز بناکر تو وکٹ پر موجود تھے۔

میچ میں کراچی کنگز کی جانب سے شاندار بولنگ کا مظاہرہ دیکھنے کو ملا، ملتان کے 5 بلے بازوں کو ڈبل فیگر میں بھی داخل نہ ہونے دیا۔ معین علی نے 29 رنز بنائے۔

کراچی کنگز کے کپتان عماد وسیم اور عامر یامین نے دو دو جبکہ محمد عامر اور عمر خان نے ایک ایک وکٹ حاصل کی۔