کراچی: کل سے شروع ہونے والی ایچ بی ایل پی ایس ایل فائیو کی ٹرافی کی رونمائی کراچی میں کردی گئی۔ لیجنڈری جہانگیر خان ٹرافی تھامے اسٹیڈیم آئے، ملتان سلطانز کے کپتان شان مسعود نے شرکت نہیں کی جبکہ دیگر نے ٹائٹل کیلئے ایڑی چوٹی کا زور لگانے کی ٹھان لی۔

جوش دکھے گا، باجا بجے گا اور میدان بھی سجے گا۔ ایچ بی ایل پی ایس ایل فائیو جمعرات سے شروع ہوگا۔ چمچماتی ٹرافی کی نیشنل اسٹیڈیم میں رونمائی کردی گئی۔

لیجنڈری جہانگیر خان نے ٹرافی کے ہمراہ انٹری دی اور ٹرافی کوئٹہ گلیڈی ایٹرز کے کپتان سرفراز احمد کو تھمائی۔

ملتان سلطانز کے کپتان شان مسعود نے شرکت نہیں کی۔ دیگر کپتانوں نے ٹرافی کے ساتھ پوزنگ کرائی اور ٹائٹل جیتنے کا عزم ظاہر کیا۔

رنگا رنگ افتتاحی تقریب جمعرات کی شام ہوگی جبکہ پہلا میچ رات 9 بجے دفاعی چیمپئن کوئٹہ گلیڈی ایٹرز اور اسلام آباد یونائیٹڈ کے درمیان کھیلا جائے گا۔