پاکستان میں بدھ کو کالعدم تنظیم جماعت الدعوۃ کے سربراہ حافظ سعید کو لاہور کی انسداد دہشت گردی کی عدالت نے دہشت گردی کے لیے رقم جمع کرنے اور کالعدم تنظیم کا رکن ہونے پر 11 سال قید کی سزا سنائی ہے۔

یہ پاکستان میں پہلی بار ہوا ہے کہ کسی کالعدم جماعت کے سربراہ کو دہشت گردی کے لیے رقم جمع کرنے کے الزام میں سزا ہوئی ہے۔

دہشت گردی کے مقاصد کے لیے چندہ اکھٹا کرنا پاکستان کے انسداد دہشت گردی ایکٹ 1997 کی شق 11 ایچ کے تحت قابل سزا جرم ہے۔

دہشت گردی کے لیے بالواسطہ یا بلاواسطہ پیسے، اشیا یا پراپرٹی جمع کرنا اور پیسے جمع کرنے کی ترغیب دینا اس جرم کے دائرے میں آتا ہے۔

اس شق کے تحت کوئی شخص جو دوسروں سے رقم اور دیگر اشیا فراہم کرنے کی ترغیب دے اور اسے معلوم ہو یا اس کا ارادہ ہو کہ یہ رقم اور جائیداد دہشت گردی کے لیے استعمال ہو گی تو وہ مجرم تصور ہو گا۔ اسی طرح ان مقاصد کے لیے کوئی شخص اگر چندہ اکھٹا کرے تو اس پر بھی دہشت گردی ایکٹ کی اس دفعہ کا اطلاق ہوگا۔