پاکستان کی صف اول کی اداکارہ ماہرہ خان اور میرا جی کی ایک ویڈیو سوشل میڈیا پر گردش کررہی ہے جس میں ان دونوں کو پہلی بار دوستانہ ماحول میں گفتگو کرتے ہوئے دیکھا جاسکتا ہے۔

گزشتہ روز دبئی میں ہونے والی ایک ایوارڈ شو ماہرہ خان اور میرا جی کی ملاقات ہوئی اور دونوں کے درمیان دلچسپ جملوں کا تبادلہ ہوا۔

ویڈیو میں ماہرہ خان کو یہ کہتے ہوئے سنا جاسکتا ہے کہ میں پہلی بار آپ سے اپ سیٹ ہوئی ہوں جس پر میرا جی نے سوال کیا کہ میں نے ایسا کیا کردیا تو ماہرہ نے کہا کہ ہم دونوں اچھے دوست بن گئے تھے، آپ کو یاد ہے؟ تو میرا جی نے جواب دیا ہاں۔۔ ساتھ ہی ویڈیو بنانے والے اداکار شہریار منور نے بھی کہا کہ ہاں مجھے بھی یاد ہے۔

اس کے بعد ماہرہ نے کہا کہ لیکن میں نے ابھی کسی سے سنا ہے کہ آپ نے میرے بارے میں ایک بار پھر کچھ بولا ہے تو میرا جی نے قسم کھاتے ہوئے کہا کہ میں نے کچھ بھی ایسا نہیں کہا۔

واضح رہے کہ گزشتہ دنوں دئیے گئے ایک انٹرویو میں میرا جی نے کہا تھا کہ وہ ماہرہ خان سے زیادہ باصلاحیت ہیں، اس کے باوجود شوبز انڈسٹری میں ماہرہ کو بلاوجہ اہمیت دی جاتی ہے اور اُن کے حصے کا کام بھی انہیں دے دیاجاتا ہے۔