انڈرنائنٹین کرکٹ ورلڈکپ کے فائنل سے قبل ہی پاکستان ٹیم کی چھٹی ہوگئی۔ سیمی فائنل میں روایتی حریف بھارت سے 10 وکٹوں سے ناکامی کا منہ دیکھنا پڑا۔

بھارت کیخلاف انڈر نائنٹین ورلڈکپ کے پہلے سیمی فائنل میں شاہینوں کے اوسان خطا ہوگئے، بیٹنگ نے ستم ڈھائے تو بولرز نے بھی ہاتھ پیر ڈال دیئے اور کوئی کرشمہ نہ دکھاسکے۔

پہلے بیٹنگ کرتے ہوئے حیدر اور روحیل نے نصف سنچریاں بنائیں لیکن پھر وکٹوں کی جھڑی لگ گئی۔ اننگز 44 ویں اوور میں 172 پر نمٹ گئی، آخری 6 وکٹیں 26 رنز پر گریں اور 8 کھلاڑیوں نے ڈبل فیگرز میں داخل ہونے کی بھی زحمت نہ کی۔

تعاقب میں دفاعی چیمپئن بھارت نے تحمل مزاجی دکھائی اور ہستے کھیلتے 36 ویں اوور میں بناء کسی نقصان کے میدان مارلیا اور مسلسل تیسری بار فائنل میں جگہ بنالی۔

بھارتی اوپنر یشاسوی جیسوال کو شاندار ناقابل شکست سینچری اسکور کرنے پر میچ کا بہترین کھلاڑی قرار دیا گیا۔