معروف امریکی پاپ گلوکارہ لیڈی گاگا نے انکشاف کیا ہے کہ انہیں 19 سال کی عمر میں بار بار زیادتی کا نشانہ بنایا گیا ہے۔

اپنے ایک حالیہ انٹرویو میں پاپ گلوکارہ نے بتایا کہ انہیں 19 سال کی عمر میں متعدد مرتبہ زیادتی کا نشانہ بنایا گیا جس کی وجہ سے وہ ذہنی تناؤ اور پریشانی کا شکار رہیں۔

انٹرویو کے دوران انہوں نے ذہنی صحت سے متعلق معاملات پر کھل کر بات کرتے ہوئے بتایا کہ وہ کیریئر کی ابتدا میں اس مسئلے کا شکار رہیں کیونکہ ان کے ساتھ بار بار زیادتی کی گئی۔

انہوں نے پہلی مرتبہ نومبر 2018 میں اس بات کا انکشاف کرتے ہوئے کہا تھا کہ انہیں پہلے ہی زیادتی کے معاملے پر بولنا چاہیئے تھا تاہم وہ ایسا نہیں کرسکی تھیں۔

انٹرویو کے دوران 32 سالہ گلوکارہ نے کہا کہ بار بار ریپ کئے جانے کی وجہ سے ان کے ذہن پر منفی اور برے اثرات مرتب ہوئے تھے۔

اپنی گفتگو کے دوران پاپ گلوکارہ آبدیدہ ہوگئیں، انہوں نے بتایا کہ اس واقعے کے بعد وہ جلد ہی معروف گلوکارہ بن گئیں اور امریکا سے نکل کر دنیا کے دوسرے ممالک کا دورہ کیا جس کی وجہ سے ان کی ذہنی الجھن کم ہوئی۔