چیئرمین پیپلزپارٹی بلاول بھٹو زرداری نے دعویٰ کیا ہے کہ مسلم لیگ ن اور تحریک انصاف  پارلیمانی قواعد و ضوابط کو نظر انداز کر کے آرمی ترمیم ایکٹ کی غیرمشروط حمایت کر کے ایوانوں سے منظوری کا فیصلہ کر چکی تھیں۔ اب اس بل کو سینیٹ کی قائمہ کمیٹی میں بھی نظرثانی کے لئے بھیجا جائیگا۔

بلاول بھٹو کا کہنا تھا کہ یہ مثبت پیغام ہے کہ ایک سال سے زائد عرصہ غیرفعال رکھی جانے والی پارلیمان قانون سازی کے لئے تیار ہے۔

 بلاول بھٹو زرداری نے اپنے ایک ٹویٹ کرتے ہوئے کہا کہ جب میں اسلام آباد پہنچا تو مسلم لیگ ن اور پی ٹی آئی آرمی ایکٹ کی غیرمشروط حمایت بلکہ یہ بھی فیصلہ کر چکی تھیں کہ بل کو نہ تو تمام اراکین اسمبلی کو دیا جائے گا اور نہ ہی اسے کمیٹی کو دیکھنے کیلئے بھیجا جائیگا۔

ان کا کہنا تھا کہ خوشی ہے کہ تمام پارٹیاں بل کو واپس قومی اسمبلی کی کمیٹی میں بھیجنے پر متفق ہوئیں۔  دونوں ایوانوں کے قواعد و ضوابط کی پاسداری کے ساتھ یہ بل سینیٹ کی قائمہ کمیٹی میں بھی نظرثانی کے لئے جائیگا۔

بلاول بھٹو نے کہا کہ  پارلیمان سے اختیارات لینے والے تمام ادارے پارلیمانی بالادستی کو قبول کرکے ہم سے قانون سازی کا کہہ رہے ہیں۔ یہ ان کے لئے اہم کامیابیاں ہیں کہ جو پارلیمانی بالادستی اور جمہوریت کے لئے ہمیشہ جدوجہد کرتے رہے ہیں۔