لاہور کے لنڈا بازار میں کام کرنے والے خاندان کے سپوت قاسم اکرم جونئیر ورلڈکپ میں پاکستان کی نمائندگی کریں گے۔ آل راؤنڈر قاسم اکرم بھارتی کپتان ویرات کوہلی اور بابر اعظم کی طرح لمبے عرصے تک کرکٹ کھیلنے کے خواہشمند ہیں۔

لاہور کے علاقے کوٹ خواجہ سعید سے تعلق رکھنے والے 17 سالہ آل راؤنڈر قاسم اکرم کی کرکٹ میں انٹری ایک بال پکر کی حیثیت سے ہوئی، ایک مقامی کلب سے کرکٹ کیئریر کا آغاز کرنے والے قاسم اکرم کے والد اور بھائی لنڈا بازار میں کام کرتے ہیں۔

 قاسم اکرم دنیائے کرکٹ کے دو بہترین بلے باز بابر اعظم اور ویرات کوہلی کی طرح زیادہ عرصے تک کرکٹ کھیل کر ملک اور خاندان کا نام روشن کرنا چاہتے ہیں۔

قاسم اکرم کا ہدف جونئیر ورلڈکپ میں شاندار کارکردگی دکھا کر قومی ٹیم میں مستقل جگہ بنانا ہے۔