اسکینڈل کوئین اداکارہ میرا کی تکذیب نکاح کی اپیل پر فیملی عدالت کا مکمل ریکارڈ سیشن عدالت پیش کردیا گیا۔ عدالت نے آئندہ سماعت پر وکلاء کو حتمی بحث کیلئے طلب کرلیا۔

ایڈیشنل سیشن جج شہزاد مظفر ہمدانی نے اداکارہ میرا کی اپیل پر سماعت کی۔ ٹرائل عدالت سے مقدمے کا ریکارڈ سیشن عدالت پیش کردیا گیا، ریکارڈ پیش کرنے پر عدالت نےعدالتی اہلکاروں کے وارنٹ گرفتاری واپس لے لئے۔

عدالت نے کیس کی سماعت 7 جنوری تک ملتوی کرتے ہوئے وکلاء کو حتمی بحث کے لیے طلب کرلیا۔

عدالت نے کیس کا ریکارڈ جمع نہ کروانے پر عدالتی اہلکار کے وارنٹ گرفتاری جاری کئے تھے۔

اداکارہ میرا نے اپیل میں موقف اختیار کر رکھا ہے کہ فیملی عدالت نے حقائق کے برعکس فیصلہ سناتے ہوئے عتیق الرحمن کے نکاح کودرست قراردیا، اداکارہ میرا عتیق الرحمان نامی اپیل کنندہ کو نہیں جانتی، انہوں نے استدعا کی ہے کہ عدالت فیملی کورٹ کا فیصلہ کالعدم قرار دے۔