اسلام آباد: سابق صدر کے خلاف سنگین غداری کیس کا تفصیلی فیصلہ آنے پر معروف گلوکار ہارون شاہد نے سوال اٹھا دیا کہ کہیں یہ فیصلہ شہباز شریف نے تو نہیں لکھا ہے۔

آج خصوصی عدالت نے سابق صدر جنرل (ر) پرویز مشرف کے خلاف سنگین غداری کیس کا تفصیلی فیصلہ جاری کیا، جس میں پرویز مشرف کو غدار قرار دیا ہے۔ اس تفصیلی فیصلے میں یہ بھی کہا گیا ہے کہ سزا سے قبل اگر سابق صدر فوت ہوجائیں تو ان کی لاش کو گھسیٹ کر ڈی چوک لایا جائے اور 3 روز تک پھانسی پر لٹکایا جائے۔

عدالتی فیصلے میں 'گھسیٹ کر ڈی چوک لایا جائے' کے لفظوں پر مزاحیہ انداز اپناتے ہوئے گلوکار ہارون شاہد نے سوال اٹھایا کہ کہیں یہ فیصلہ شہباز شریف نے تو نہیں لکھا ہے؟

Wait, is that Shahbaz Sharif giving the judgement?? 😂 "Sarkon pay ghaseetoon ga" #MusharafVerdict What a farce! Godfather kehnay pay aag lag gai thee aur aaj judge jo keh de theek hai?? pic.twitter.com/qy81G8BxHX

— Haroon Shahid (@HaroonsMusic) December 19, 2019

انہوں نے اپنی ٹویٹ میں عدالتی فیصلے کا اسکرین شاٹ لگاتے ہوئے 'سڑکوں پہ گھسیٹوں گا' لکھا اور مشرف کیس کے فیصلے کو ڈھونگ قرار دیا۔

انہوں نے یہ بھی سوال کیا کہ 'گاڈ فادر' کہنے پر آگ لگ گئی تھی اور آج جج جو کہہ دیں ٹھیک ہے؟

واضح رہے کہ موجودہ اپوزیشن لیڈر شہباز شریف نے 2013 کی انتخابی مہم کے دوران یہ دعویٰ کیا تھا کہ 'اگر انہیں حکومت مل گئی تو وہ زرداری کو اسلام آباد اور لاڑکانہ کی سڑکوں پر گھسیٹیں گے'۔

شہباز شریف نے یہ بھی دعویٰ کیا تھا کہ 'زرداری کا پیٹ پھاڑ کر قوم کا لوٹا ہوا پیسہ نکالیں گے اور اگر وہ ایسا نہ کرسکیں تو ان کا نام تبدیل کردیا جائے'۔