لاہور کے علاقے ٹاون شپ میں دھماکے سے ایک شخص جاں بحق اور چھ زخمی ہوگئے۔پولیس اور دیگر تحقیقاتی اداروں نے واقعے کو اے سی گیس سلنڈر کا دھماکہ قرار دیدیا۔

لاہور  کے علاقے ٹاون شپ میں کالج روڈ پر مذہبی جماعت کی جانب سے کانفرنس جاری تھی کہ اسٹیج کے عقب میں واقع اے سی کی دکان کے باہر دھماکہ ہو گیا۔

واقعے میں محمود نامی اے سی ٹیکنیشن جاں بحق جبکہ چھ افراد زخمی ہوگئے۔ دھماکے کی اطلاع ملتے ہی پولیس کی بھاری نفری موقع پر پہنچ گئی۔

 پولیس کے مطابق زخمیوں میں احسان، عبدالغفور، ابوبکر، اشفاق،اسلم اور دلشاد شامل ہیں۔ زخمیوں کی حالت خطرے سے باہر بتائی جاتی ہے۔

ترجمان سی ٹی ڈی کے مطابق مکینک حافظ محمود اے سی کٹ لگا رہا تھا کہ بلاسٹ ہو گیا۔ ابتدائی طور پر جائے وقوعہ سے سلنڈر کے ٹکڑے ملے ہیں جبکہ بارود کا کوئی سراغ نہیں ملا۔

 تاہم موقع سے ملنے والے سیمپلز کو لیباریٹری ٹیسٹ کیلئے بھیجوا دیا گیا ہے.پولیس کا کہنا ہے کہ رپورٹس آنے کے بعد ہی حتمی طور دھماکے کی نوعیت کا تعین کیا جا سکے گا۔