راولپنڈی: راولپنڈی پولیس نے امتیاز عرف تاجی کھوکھر کو گرفتار کرلیا ہے۔

گرفتار ملزم تاجی کھوکھر پی پی پی کے سینیٹر مصطفیٰ نواز کھوکھر کے چچا اور سابق ڈپٹی اسپیکر قومی اسمبلی نواز کھوکھر کے چھوٹے بھائی ہیں۔

ایس پی پوٹھوہار سید علی کے مطابق گرفتار ملزم کے قبضے سے بھاری مقدار میں اسلحہ برآمد ہوا ہے جس میں ایم فور رائفل، ٹرپل ٹو گن، ایس ایم جی، پستول، 23 میگزین اور 665 گولیاں شامل ہیں۔

ایس پی نے بتایا کہ تاجی کھوکھر نے ریٹائرڈ صوبیدار کی زمین پر قبضے کی کوشش کی تھی جس کے حوالے سے ایف آئی آر درج ہے۔

ایس پی سید علی کا کہنا ہے کہ گرفتار ملزم 15 دیگر سنگین نوعیت کے دیگر مقدمات میں بھی نامزد ہے۔

گرفتار ملزم کے خلاف درج دیگر مقدمات میں قتل، اقدام قتل، پولیس مقابلہ، قبضہ اور اشتہاری ملزمان کو پناہ دینے کے الزامات ہیں۔