اردن میں ایک گھر میں آتشزدگی سے تیرہ پاکستانی جاں بحق ہوگئے ۔  اردن کے سول ڈیفنس کے حکام نے واقعے کی تصدیق کی ہے اور کہا ہے کہ جاں بحق افراد میں آٹھ بچے اور چار خواتین شامل ہیں ۔

یہ آگ عمان کے دیہاتی علاقے شونا کے ایک فارم ہاوس میں واقع گھر میں لگی ، جس سے تیرہ پاکستانی جاں بحق ہوگئے اور تین زخمی ہوگئے ۔

اردن ے سول ڈیفنس کے حکام کے مطابق فارم ہاوس میں یہ فیملیز ایک عارضی عمارت میں مقیم تھیں، اس نوعیت کی عمارتیں عام طور پر تارکین وطن مزدوروں کو رہائش کیلئے فارم ہاوسز میں دی جاتی ہیں ۔

اردن میں ہزاروں تارکین وطن فارم ہاوسز پر مزدوری کرتے ہیں اور ان میں کئی مزدور انتہائی ناگفتہ بہ حالات میں ان فارم ہاوسز میں قائم عمارتوں میں رہائش پذیر ہوتے ہیں ۔

اردن کے وزیراعظم نے واقعے پر حکومت پاکستانی اور لواحقین سے اظہار افسوس کیا ہے اور واقعے کی تحقیقات جلد مکمل کرنیکے احکامات دیئے ہیں ۔