اسلام آباد: وزیراعظم عمران خان  نے نواز شریف کو تنقید کا نشانہ بناتے ہوئے کہا کہ نواز شریف کو جہاز پر چڑھتے دیکھا تو ان کی میڈیکل رپورٹ چیک کی۔ ڈاکٹرز نے تو کہا تھا کہ نوازشریف کی حالت بہت خراب ہے۔ کہا جارہا تھا کہ بیرون ملک نہ گئے تو جان کو خطرہ ہوگا۔ تحقیقات کرنے کی ضرورت ہے وہ اچانک کیسے ٹھیک ہوگئے۔ نوازشریف کو سیڑھیاں چڑھتے دیکھ کر کہا، اللہ یہ تیری شان ہے۔

وزیراعظم کی جانب سےتنقید کے بعد سوشل میڈیا پر ایک ویڈیو سامنے آئی ہے، جس میں دیکھا جاسکتا ہے کہ نواز شریف کو لفٹر کے ذریعے ایئر ایمبولینس میں سوار کرایا گیا۔ جس کی تصدیق مسلم لیگ ن کے رہنما احسن اقبال نے بھی کی ہے۔

نواز شریف کو لفٹ کے ذریعے جہاز میں پہنچایا گیا تھا pic.twitter.com/f7cm6pPDnn

— صحرانورد (@Aadiiroy) November 22, 2019

سوشل میڈیا پر وائرل ویڈیو میں دیکھا جاسکتا ہے کہ کس طرح سابق وزیر اعظم نواز شریف کو ایئر ایمبولینس میں لفٹر کے ذریعے اٹھا کر سوار کیا جارہا ہے۔

مسلم لیگ ن کے سیکرٹری جنرل احسن اقبال کے مطابق  وزیراعظم کہتے ہیں کہ نوازشریف کو سیڑھیاں چڑھتے دیکھا لیکن نوازشریف کو لفٹرکے ذریعے جہاز میں بٹھایا گیا۔

انہوں نے سوال اٹھایا کہ کیا وزیرِاعظم عمران خان  کو شوکت خانم کے ڈاکٹرزاور صوبائی وزیر صحت یاسمین راشد نے بھی دھوکا دیا ہے؟

احسن اقبال کا کہنا تھا کہ نوازشریف کے ذاتی معالج ڈاکٹرعدنان مسلسل میڈیا کو باخبر رکھتے ہیں، مگر لگتا ہے وزیراعظم بہت لاعلم ہیں۔