شہر لاہور میں اسموگ سے چُھٹکارا حاصل کرنے کیلئے کمشنر لاہور نے مصنوعی بارش کروانے کی تجویز دے دی۔ وزیراعلیٰ پنجاب کی منظوری کے بعد عملدرآمد کروایا جائے گا۔

 کمشنر لاہور ڈویژن آصف بلال لودھی کی جانب سے لاہور میں اسموگ کے خاتمے کیلئے مصنوعی بارش برسانے کی تجویز بھیج دی گئی۔

کمشنر لاہور کی تجویز منظوری کیلئے محکمہ خزانہ پنجاب کو بھجوا دی گئی ہے جو حتمی منظوری کیلئے وزیراعلیٰ پنجاب سردار عثمان بزدار کو بھجوائی جائے گی۔۔ حکام کے مطابق لاہور میں مصنوعی بارش کیلئے راکٹ لانچر یا جہاز کے ذریعے کلاؤڈ سیڈنگ کی جائے گی اور اس کیلئے ڈرائی آئس یا سلور آئیو ڈائیٹ کا استعمال کیا جائے گا۔۔ مصنوعی بارش پر 30 سے 35 کروڑ روپے لاگت آنے کا امکان ہے۔

واضح رہے کہ لاہور اور گردونواح میں اسموگ نے ڈیرے ڈال رکھے ہیں جس کی وجہ سے شہریوں کو آنکھوں اور سانس کی بیماریاں لاحق ہو رہی ہیں۔ اسموگ کے باعث لاہور، گوجرانوالہ اور شیخوپورہ کے اضلاع میں آج تمام اسکولز میں چھٹی بھی دی گئی ہے۔