لندن: فضائی سفر کے دوران ہماری خواہش ہوتی ہے کہ کھڑکی والی نشست مل جائے تاکہ اونچائی سے باہر کے خوبصورت مناظر اور بادلوں سے لطف اندوز ہوسکیں۔

مسافروں کی اس شدید خواہش کو مدنظر رکھتے ہوئے ایک برطانوی ٹیکنالوجی فرم نے مستقبل میں طیاروں کو اس طرح ڈیزائن کرنے کا پروگرام بنایا ہے جس میں پورا طیارہ آسمان کے "پینورامک ویو" میں تبدیل ہوجائے گا۔

رپورٹ کے مطابق اس نئی ٹیکنالوجی کے کے آنے سے مستقبل میں طیاروں میں کھڑکیوں کا تصور ختم ہوجائے گا اور  پورا طیارہ "او ایل ای ڈی" اسکرین سے ڈھک دیا جائے گا جس سے ہر نشست ایک قسم کی "ونڈو سیٹ" بن جائے گی۔

یہ ٹچ اسکرینز طیارے کے باہر لگے کیمروں سے منسلک ہوں گی جو باہر کا حقیقی منظر ہر نشست پر پیش کریں گی جب کہ مسافر اپنی مرضی سے "او ایل ای ڈی" پر مناظر  کے بجائے اینٹرٹینمنٹ سسٹم کے ذریعے دیگر پروگرام بھی دیکھ سکیں گے۔

٭او ایل ای ڈی کیا ہے؟

یہ "آرگینک لائٹ ایمٹنگ ڈایوڈ" کا مخفف ہے۔ اس میں نامیاتی مرکبات (آرگینک کمپاؤنڈز) پر مشتمل ایک ایسی پتلی فلم ہوتی ہے جس میں سے بجلی گزاری جاتی ہے تو وہ روشنی خارج کرتی ہے۔ یہ ٹیکنالوجی ٹیلی ویژن، ٹیبلٹ کمپیوٹرز، موبائل فونز اور کمپیوٹر مانیٹرز میں استعمال ہورہی ہے۔

ماہرین کا کہنا ہے کہ جب تک یہ طیارے حقیقت میں تیار کیے جائیں گے، امید ہے کہ تب تک اس سے کہیں زیادہ جدید اور بہتر او ایل ای ڈی ڈسپلے مارکیٹ میں آچکے ہوں گے۔