پاکستان تحریک انصاف کے رہنما اور معروف ٹی وی میزبان عامر لیاقت حسین کی دوسری اہلیہ سیدہ طوبیٰ عامر نے پیسوں کیلئے عامر لیاقت سے شادی کا الزام لگانے والے سوشل میڈیا صارفین کو کرارا جواب دے دیا۔

سیدہ طوبیٰ عامر نے حال ہی میں انسٹاگرام پر سوال جواب سیشن کے دوران متعدد سوالوں کے جواب دیئے، اس سوالات کے سیشن میں مداحوں نے کئی دلچسپ اور چبھتے ہوئے سوالات کئے اور طوبیٰ نے ان کے جوابات بھی دیئے۔

  ایک صارف نے سوال کیا کہ 'دنیا میں اور بھی بہت اچھے لوگ تھے آپ نے عامر انکل سے ہی کیوں شادی کی؟' جس پر طوبیٰ عامر نے کہا کہ 'وہ دنیا کے اُن بہت سارے اچھوں لوگوں میں سے بھی زیادہ اچھے ہیں'۔

ایک اور صارف نے سوال پوچھا کہ 'کیا آپ واقعی عامر سے محبت کرتی ہیں یا پھر پیسے کیلئے ان سے شادی کی ہے'؟ اس سوال پر طوبیٰ نے تفصیلی جواب دیتے ہوئے لکھا کہ 'شادی مذاق نہیں ہوتی اور نہ ہی کسی کے پاس اتنا وقت اور توانائی ہے کہ وہ انہیں پیسوں کیلئے شادی کرنے میں ضائع کرے۔ میں ایک بہت اچھے گھرانے سے تعلق رکھتی ہوں اور عامر لیاقت سے ملنے سے قبل بھی میں کام کررہی تھی اور اچھا کمارہی تھی'۔

انہوں نے مزید لکھا کہ 'آپ لوگوں کو اس طرح کی باتیں لکھتے ہوئے دھیان رکھنا چاہیئے۔ سوچیں اگر کوئی آپ کے شوہر یا فیملی کے بارے میں اس طرح کی باتیں لکھے تو آپ کو کیسا لگے گا۔ اللہ پاک میرے عامر لیاقت کو صحت، لمبی زندگی اور کامیابی عطا کرے، آمین'۔