ہوابازی سے متعلق عالمی تنظیم ایکاو نے بھارت کی پاکستان کیخلاف شکایت کو مسترد کردیا ۔

پاکستان نے بھارتی وزیراعظم نریندر مودی کو سعودی عرب جانے کیلئے اپنی فضائی حدود استعمال کرنیکی اجازت دینے سے انکار کردیا تھا، جس کے بعد بھارت نے اس حوالے سے شکایت ایکاو میں کی تھی۔

اب ایکاو نے پاکستان کیخلاف بھارتی شکایت کو مسترد کردیا ہے، ترجمان نے کہا ہے کہ  ایکاو کے قوانین صرف سویلین جہازوں پر لاگو ہوتے ہیں اور ایکاو قوانین کے تحت تمام ممبر ممالک کی حکومتیں اس پر اطلاق کی پابند ہیں۔

بیان میں مزید کہا گیا ہے کہ لیڈران کو لے کر سفر کرنے والی پروازیں اسٹیٹ ایئرکرافٹ کہلاتی ہیں اور ان پر ایکاو کے قوانین لاگو نہیں ہوتے ۔

بھارت کی جانب سے فضائی قوانین سے متعلق عالمی تنظیم  ایکاو سے رابطہ کیا گیا تھا کہ پاکستان نے اپنی فضائی حدود بھارتی وزیراعظم نریندر مودی کو استعمال کرنیکی اجازت نہیں دی ہے۔

ایکاو کا شمار ایویشن کی عالمی تنظیموں میں ہوتا ہے اور یہ اس حوالے سے  عالمی قوانین پر عملدرآمد کی نگرانی کے فرائض سرانجام دیتی ہے۔

 بعدازاں وزیر خارجہ شاہ محمود قریشی کی جانب سے بیان جاری کیا گیا ہے ،  بیان  میں کہا گیا ہے کہ یہ فیصلہ یوم سیاہ پر کشمیری عوام سے اظہار یکجہتی اور حال ہی میں انسانی حقوق کی پامالی کے تناظر میں میں لیا گیا ہے