لاہور: قومی کرکٹ ٹیم آئندہ سال نیدرلینڈز کے خلاف 3 ایک روزہ میچوں پر مشتمل سیریز کھیلے گی، آئرلینڈ اور پاکستان کے درمیان 2 ٹی ٹوینٹی میچز کی سیریز جولائی 2020 میں ہوگی۔

پاکستان اور نیدرلینڈز کے خلاف ایک روزہ سیریز کا پہلا میچ 4 جولائی کو، دوسرا اور تیسرا ایک روزہ میچ 7 اور 9 جولائی کو کھیلا جائے گا۔

نیدرلینڈز اور پاکستان کے درمیان ایک روزہ میچز ایمسٹلوین میں کھیلے جائیں گے جبکہ آئرلینڈ اور پاکستان کے درمیان 2 ٹی ٹوینٹی میچز 12 اور 14 جولائی کو کھیلے جائیں گے۔

چیئر آف کے این سی بی بیٹی ٹمر کہتے ہیں کہ پاکستان اور نیدرلینڈز کے درمیان سیریز کا اعلان کرنے پر مسرور ہیں، پاکستان کرکٹ ٹیم کی آمد سے نیدرلینڈز میں کرکٹ کو فروغ ملے گا۔

دوسری جانب ورتھ پرفارمنس ڈائریکٹر کرکٹ آئرلینڈ رچرڈ ہولڈز کہتے ہیں کہ ٹی ٹوینٹی کی عالمی رینکنگ میں پہلی پوزیشن پر براجمان پاکستان ٹیم کی میزبانی کے لیے پرجوش ہیں پاکستان کے خلاف سیریز ہمارے کھلاڑیوں کے لیے بہترین تجربہ ہوگی۔

ڈائریکٹر انٹرنیشنل کرکٹ ذاکر خان کہتے ہیں کہ پاکستان کرکٹ بورڈ نیدرلینڈز اور آئرلینڈ کے دورے کا منتظر ہے، پی سی بی کے کرکٹ آئرلینڈ اور کے این سی بی کے ساتھ مضبوط تعلقات استوار ہیں۔