صدام حسین کے خاندان کے خاتمے کے بعد ان کی باقیات بھی اپنا وجود کھو رہی ہیں۔

العریبیہ کی رپورٹ کے مطابق سابق عراقی صدر صدام حسین کے بڑے صاحب زادے عدی صدام حسین کو شوقین مزاج "شہزادہ" تصور کیا جاتا تھا۔ اس نے گھوڑوں کے ساتھ کئی دوسرے جنگلی جانور جن میں چیتے اور شیر بھی شامل تھے پال رکھے تھے۔

عدی کے شیر اور چیتے بغداد پارک میں کئی سال تک توجہ کا مرکز بنے رہے اور اب اطلاعات ہیں کہ انہیں کُرد اکثریتی صوبے کردستان کے دارالحکومت اربیل کے جنگلی حیات کیلئے بنائے گئے ایک پارک میں چھوڑا گیا ہے۔

اربیل میں جنگلی حیات کیلئے قائم کردہ پارک کے ڈائریکٹر ہیریش کمال نے کہا کہ عدی کے قبضے میں رہنے والے شکاری جانورنوں "دیکھ بھال" کیلئے اربیل میں منتقل کیا گیا ہے۔

کمال نے بتایا کہ بغداد نے دیکھ بھال کیلئے دو شیر، دو چیتے، دو ریچھ اور دو بندر بھیجے تھے۔ انہوں نے کہا کہ جانور بھیجنا بغداد اور اربیل کے درمیان ہم آہنگی پیدا کرنے کی کوشش ہے۔

واضح رہے کہ عدی صدام حسین اپنے بھائی قصی کے ساتھ امریکی فورسز کے ہاتھوں مارے گئے تھے۔

عراق پر امریکی یلغار کے بعد اتحادی فوج نے بغداد کے چڑیا گھر سے بہت سے جانور قبضے میں لے لیے تھے۔ ان میں سے بہت کم واپس کیے گئے ہیں۔