لاہور: اولمپک کوالیفائنگ راﺅنڈ کے لئے قومی ہاکی ٹیم کے تربیتی کیمپ کا دوسرا مرحلہ لاہور میں شروع ہوگیا ہے۔ قومی ٹیم کے انتخاب کے لئے دو روزہ ٹرائلز کا آغاز نو اکتوبر سے ہوگا۔

  نیشنل ہاکی سٹیڈیم لاہور میں طلب کئے گئے پینتس میں سے تیس کھلاڑیوں نے دو سیشنز میں پریکٹس کی۔

ہیڈ کوچ اولمپئین خواجہ جنید نے بتایا کہ بیرون ممالک لیگ کھیلنے والے پانچ کھلاڑی سات اکتوبر کو کیمپ میں شمولیت اختیار کر لیں گے، نو اور دس اکتوبر کو ٹرائلز ہوں گے جس کے بعد حتمی ٹیم کا اعلان کر کے کھلاڑیوں کے نام بارہ اکتوبر تک ایف آئی ایچ کو بھجوائے جائیں گے۔

 ہاکی ٹیم کے فزیو ڈاکٹر اسد عباس کے مطابق کیمپ میں کھلاڑیوں کی فزیکل فٹنس پر خصوصی توجہ دی جارہی ہے۔

گرین شرٹس اولمپک کوالیفائنگ راونڈ کے دو میچز چھبیس اور ستائیس اکتوبر کو ہالینڈ کے خلاف کھیلے گی۔