اینٹی کرپشن ساہیوال نے شریف فیملی کی ملکیت اتفاق شوگر ملز میں بڑی کارروائی کرکے غیر قانونی طور پر حاصل کی گئی 36 کنال سرکاری اراضی کو واگزار کرالیا۔

 اتفاق شوگر ملز 1982 سے سرکاری رقبے پر قابض تھی، اینٹی کرپشن پاکپتن نے ضلعی انتظامیہ کے ساتھ ملکر قبضہ واگزار کروایا۔

سرکاری رقبے پر مِل مالکان نے اسٹورز اور لیبارٹری قائم کر رکھی تھی، اینٹی کرپشن حکام نے مِل کے مختلف حصوں کو گرا کر قبضہ واگزار کروایا اور قبضہ ریونیو عملے کے حوالے کردیا گیا۔

ریجنل ڈائریکٹر اینٹی کرپشن ساہیوال کے مطابق سرکاری زمین کی مالیت 3 کروڑ 25 لاکھ روپے بنتی ہے۔

اتفاق شوگر ملز پاکپتن میں شریف فیملی کی ملکیت میں ہے، محکمہ اینٹی کرپشن کے مطابق مل انتظامیہ سے 1982 سے اب تک کے تمام بقایاجات وصول کیے جائیں گے اور قبضہ مافیا کے خلاف بھرپور کارروائیاں جاری رکھی جائیں گی۔