قائداعظم ٹرافی کا دوسرا راؤنڈ کل سے ملک کے مختلف شہروں میں شروع ہوگا۔ کوئٹہ میں 11 سال بعد فرسٹ کلاس کرکٹ کی واپسی ہوگی۔ خطے میں کرکٹ کے فروغ کے لیے شائقین کرکٹ کا اسٹیڈیم میں داخلہ مفت ہوگا۔

میزبان بلوچستان اور سدرن پنجاب کی ٹیمیں چار روزہ میچ میں بگٹی اسٹیڈیم میں آمنے سامنے آئیں گی۔ سری لنکا کے دورے کے لگائے کیمپ میں ہونے کے باعث کپتان حارث سہیل کی عدم موجودگی میں بلوچستان کرکٹ ٹیم کی قیادت عمران فرحت کریں گے۔

سنٹرل پنجاب اور ناردرن کی ٹیمیں فیصل آباد کے اقبال اسٹیڈیم میں ان ایکشن ہوں گی۔ بابراعظم کی عدم موجودگی میں سنٹرل پنجاب کی قیادت کے فرائض سینئر بلے باز اظہرعلی انجام دیں گے۔ ناردرن کے کپتان عماد وسیم دستیاب نہیں، ان کی جگہ عمر امین ٹیم کو لیڈ کریں گے۔

خیبرپختونخوا اور سندھ کے درمیان یو بی ایل اسپورٹس کمپلیکس کراچی میں جوڑ پڑے گا۔ سرفراز احمد کی عدم موجودگی میں سندھ کی قیادت اسد شفیق جبکہ وکٹ کیپر محمد رضوان کی جگہ صاحبزادہ فرحان خیبرپختوانخوا کرکٹ ٹیم کی قیادت کریں گے۔

پہلے راؤنڈ میں کھیلے گئے تینوں میچز بے نتیجہ رہے تھے۔ ان تمام مقابلوں میں بلے بازوں کا راج رہا تھا۔

سمیع اسلم اور عابد علی کی ڈبل سنچریاں ملا کرکل 11 سنچریاں اسکور ہوئیں۔

خیبرپختونخوا کی ٹیم 13 پوائنٹس کے ساتھ سرفہرست ہے، سدرن پنجاب اور سینٹرل کے گیارہ گیارہ پوائنٹس ہیں۔

بہتر رن ریٹ کی بنیاد پر سدرن کی دوسری اور سینٹرل کی تیسری پوزیشن ہے۔ 9 پوائنٹس کے ساتھ سندھ کا چوتھا، 8 پوائنٹس کے ساتھ ناردرن کا پانچواں نمبر ہے جبکہ 7 پوائنٹس کے ساتھ بلوچستان کی ٹیم چھٹے اور آخری نمبر پر ہے۔