چیئرمن پی پی پی بلاول بھٹو زرداری نے میڈیا ٹربیونلز کو مسترد کردیا، کہتے ہیں کہ تحریک انصاف کی حکومت مخالفوں کو نشانہ بنانے کی مہم پر ہے۔

ان کا کہنا ہے کہ حکومت سیاسی مخالفوں کی طرح تنقید کرنے والوں کوبھی جھوٹے مقدموں میں جیلوں میں ڈالنا چاہتی ہے، پی ٹی آئی نے ہٹلر کے دوست راست بدنام زمانہ گوئبلز کی یاد تازہ کر دی ہے۔

ان کا مزید کہنا ہے کہ حکومت نے سیاسی مخالفوں اور تنقید کرنے والوں کو خاموش کرنے کا آسان راستہ ڈھونڈ نکالا ہے، نام نہاد میڈیا ٹربیونلز بھی مخالفوں اور تنقید کرنے والوں کو نشانہ بنانے کیلئے قائم کئے جا رہے ہیں۔

چیئرمین پی پی نے مزید کہا کہ اس سے پہلے نیب کے ذریعے سیاسی مخالفین کو خاموش کروانے کی کوششیں کی گئیں، ان میڈیا ٹربیونلز کا مقصد بھی صرف مخالف اور تنقید کرنے والوں کی آواز دبانا ہے۔

بلاول بھٹو زرداری نے یہ بھی کہا کہ پی ٹی آئی کی سوشل میڈیا بھی مودی کے چیلوں کی طرح کام کر رہی ہے، تحریک انصاف کی سوشل میڈیا کا کام شہریوں کو آن لائن حراساں کرنا ہے۔

یہ بھی پڑھیں: حکومت کا خصوصی میڈیا ٹریبونلز قائم کرنے کا فیصلہ

بلاول بھٹو نے مزید کہا کہ پیپلز پارٹی کسی قیمت پر میڈیا ٹریبیونلز کا بل  پاس نہیں ہونے دے گی، پاکستانی میڈیا سینسرشپ کے بد ترین دور سے گزر رہا ہے۔

انہوں نے کہا کہ پی پی پی آزادی صحافت کی علمبردار ہے، موجودہ حکومت کو کسی قیمت پر بھی آزاد ی صحافت کو نشانہ نہین بنانے دیں گے۔

واضح رہے کہ گزشتہ روز وفاقی کابینہ نے ذرائع ابلاغ کے کردار کو آزادانہ، منصفانہ اور شفاف بنانے کیلئے خصوصی میڈیا ٹریبونلز قائم کرنے کا فیصلہ کیا ہے۔