وفاقی وزیر تعلیم شفقت محمود نے نجی تعلیمی اداروں پر واضح کیا ہے کہ اگر کسی بھی پرائیویٹ اسکول نے فیس سپریم کورٹ کے حکم کے خلاف بڑھائی تو اس کے خلاف سخت کارروائی ہوگی۔

  پارلیمنٹ ہاوس کے باہر میڈیا سے گفتگو کرتے ہوئے وفاقی وزیرشفقت محمود نے کہا کہ نجی تعلیمی اداروں کے خلاف زیادہ شکایات آرہی ہیں کہ وہ فیسوں میں پانچ فیصد سے زیادہ غیرقانونی اضافہ کررہے ہیں، نجی اسکول سپریم کورٹ کے فیصلے کے مطابق فیسیں بڑھائیں۔ پرائیویٹ اسکول انتظامیہ اپنے اختیارات سے تجاوزنہ کرے ، اگر کسی بھی پرائیویٹ اسکول میں فیس سپریم کورٹ کے حکم کے خلاف بڑھائی گئی تو سخت ایکشن ہوگا۔

 شفقت محمود کا کہنا تھاکہ تمام صوبائی حکومتوں سے رابطہ کیا ہے کہ اپنے اختیارات کے مطابق اس معاملے کو کنٹرول کریں، جو بھی والدین اس حوالے سے احتجاج کررہے ہیں ان سے مذاکرات کئے جائیں۔