سیشن عدالت لاہور نے میشا شفیع کے خلاف دائر دعویٰ میں علی ظفر کے بیان پر جرح کے لیے وکلاء کو طلب کر لیا۔

لاہور کے سیشن کورٹ لاہور کے ایڈیشنل جج امجد علی شاہ نے اداکار علی ظفر کی جانب سے میشاء شفیع کے خلاف ہتک عزت دعویٰ کیس کی سماعت کی،علی طفر کی جانب سے پیش کی گئی خاتون گواہ سارہ رحمٰن نے اپنے بیان قلمبند کرواتے ہوئے بتایا کہ علی ظفر پر جھوٹا اور بے بنیاد الزام عائد کیا گیا، کبھی نہیں دیکھا کہ علی ظفر نے کسی کو حراساں کیا ہو۔

اس موقع پر علی ظفر نے عدالت کو بتایا کہ ان کے بیان پر جرح کے لیے سماعت ایک ہفتہ کے لیے ملتوی کی جائے، ایک سال سے انصاف کے لیے عدالتوں کے چکر لگا رہا ہوں۔

سپریم کورٹ نے بھی جلد فیصلہ کرنے کا حکم دیا ہے، جس پر میشاء شفیع کے وکیل نے بتایا کہ سپریم کورٹ نے ایسا کوئی فیصلہ جاری نہیں کیا، عدالت نے آئندہ سماعت پر میشا شفیع کے وکلا کو علی ظفر کے بیان پر جرح کے لیے طلب کرتے ہوئے سماعت انیس ستمبر تک ملتوی کردی۔