پنجاب حکومت کا کہنا ہے کہ محکمہ صحت میں اصلاحات کیلئے ایم ٹی آئی ایکٹ کے نفاذ سے اداروں کی پرفارمنس بڑھے گی اور کوئی نجکاری نہیں ہوگی۔ ہسپتالوں کو چلانے کیلئے مینجمنٹ کمیٹیاں مکمل خود مختار ہوں گی۔

  معاون خصوصی برائے اطلاعات فردوس عاشق اعوان، وزیر اطلاعات پنجاب اسلم اقبال اور وزیر صحت پنجاب ڈاکٹر یاسمین راشد نے لاہور میں مشترکہ پریس کانفرنس کرتے ہوئے کہا کہ یہ ایکٹ ایک انقلابی قدم ہے، حکومت فنڈز اور ملازمین کو مراعات فراہم کرتی رہے گی۔ اس ایکٹ سے علاج معالجے کی سہولیات میں بہتری آئے گی۔

  صوبائی وزیر اطلاعات میاں اسلم اقبال اور وزیر صحت یاسمین راشد نے کہا کہ اس ایکٹ کے تحت انتظامیہ خود ملازمین کو بھرتی اور نکال سکے گی۔

  صوبائی وزراء کا کہنا تھا کہ اگر ماضی کی حکومت نے صحت کے شعبے میں اصلاحات کی ہوتیں تو مریضوں کو صحت کی بہتر سہولیات دستیاب ہوتیں۔