وزیراعظم عمران خان سے چینی سنٹرل ملٹری کمیشن کے وائس چیئرمین جنرل ژو کیانگ کی ملاقات  ہوئی ہے۔ مقبوضہ کشمیر کی صورت حال پر تبادلہ خیال ہوا ، وزیراعظم کہتے ہیں مقبوضہ جموں و کشمیر سے فی الفور کرفیو اٹھا کر انسانی حقوق کی عالمی تنظیموں کو وہاں داخلے کی اجازت دی جائے ۔

 وزیراعظم عمران خان سے چین کے سنٹرل ملٹری کمیشن کے وائس چیئرمین جنرل ژو کیانگ نے ملاقات کی ۔ وزیراعظم آفس میں ہونے والی ملاقات میں مقبوضہ جموں و کشمیر کی موجودہ صورت حال پر تفصیلی تبادلہ خیال ہوا ۔ وزیراعظم موجودہ صورت حال میں چین کے کردار کو سراہتے ہوئے کہا کہ پاک چین سدا بہار دوستی اور اسٹریٹیجک پارٹنرشپ خطے میں امن کی ضامن ہے ۔ بھارت نے 3 ہفتوں سے مقبوضہ کشمیر میں مکمل لاک ڈاؤن کر رکھا ہے اور لاکھوں کشمیریوں کے حقوق پامال کئے جا رہے ہیں ۔

انہوں نے واضح کیا کہ بھارت اپنے غاصبانہ اقدامات سے دنیا کی نظر ہٹانے کے لئے جھوٹا پراپیگنڈا کر سکتا ہے ۔

جنرل ژو کیانگ کا کہنا تھا کہ چین ہر موقع بالخصوص موجودہ صورتحال میں پاکستان کے ساتھ کھڑا ہے ۔ جنوبی ایشیاء میں امن اور معاشی استحکام کے لئے متنازعہ امور کا حل ضروری ہے ۔ جنرل ژو کیانگ نے صدرِ مملکت عارف علوی سے بھی ملاقات کی ۔ صدر مملکت کا کہنا تھا کہ پاکستان چین کے ساتھ دفاعی تعلقات کو بہت اہمیت دیتا ہے ۔ چین سے پاکستان کی دوستی ہر زمانے کی آزمائش پر پوری اتری ہے ۔