پاکستان کے معروف اداکار حمزہ علی عباسی نے خوبرو اداکارہ نیمل خاور سے شادی کی تصدیق کردی، گزشتہ روز سے دونوں کی شادی کی خبریں سوشل میڈیا پر گردش کررہی تھیں۔

انہوں نے مائیکروبلاگنگ ویب سائٹ ٹویٹر کے ذریعے اپنی شادی کی تصدیق کی، اور یہ بھی بتایا کہ وہ شادی کیوں کررہے ہیں۔

انہوں نے ٹویٹ میں لکھا کہ میں نے اس چیز کا اعلان 25 کے بعد کرنے کا پلان کیا تھا مگر جیسا کہ یہ خبر پہلے ہی پھیل چکی ہے تو ابھی بتانا مناسب ہے۔

اداکار نے مزید لکھا کہ میں یہ شادی اللہ کی رضا کیلئے کررہا ہوں، نکاح کی سادہ تقریب 25 جبکہ ولیمہ 26 تاریخ کو ہوگا۔

انہوں نے مداحوں سے اپنے اور نیمل خاور کیلئے نیک تمناؤں اور دعاؤں کی درخواست بھی کی، ٹویٹ ملاحظہ کریں۔

Yup, its true. P.S Massive respect to Naimal for being ok with a Ganja me on Nikkah 🙂♥️ pic.twitter.com/8z9Uns0xo3

— Hamza Ali Abbasi (@iamhamzaabbasi) August 21, 2019

گزشتہ روز سے ہی حمزہ اور نیمل کی شادی کی خبریں گردش کررہی تھیں اور کچھ پوسٹس میں ان کی شادی کا کارڈ شیئر کیا جارہا تھا جس کے مطابق نکاح 25 اور ولیمہ 26 اگست ہونا ہے۔

حمزہ کی ہونے والی اہلیہ نمل خاور شوبز سے وابستہ ہیں اور کئی ڈراموں میں اداکاری کے جوہر دکھا چکی ہیں۔

ذرائع کے مطابق حمزہ علی عباسی کی ولیمے کی تقریب میں پاکستان تحریک انصاف (پی ٹی آئی) سے وابستہ وفاقی وزراء اور اہم شخصیات شرکت کریں گی۔

واضح رہے کہ حمزہ علی عباسی پی ٹی آئی میں اہم عہدے پر بھی فائز رہ چکے ہیں۔

حمزہ کی ہونے والی اہلیہ نیمل خاور ان دنوں معروف ڈرامہ سیریل “انا” میں اداکاری کے جوہر دکھا رہی ہیں۔