پاکستان کرکٹ ٹیم کے سابق کپتان اور موجودہ مایہ ناز کمنٹیٹر رمیز راجہ شرجیل خان کی واپسی کی خبروں پر پھٹ پڑے۔

تفصیلات کے مطابق رمیز راجہ نے اپنے یوٹیوب چینل پر ایک ویڈیو میں شرجیل خان کی جانب سے پی سی بی بحالی پروگرام کیلئے درخواست دینے پر سخت تنقید کی۔

ان کا کہنا ہے کہ 'کیا ہمارے پاس بلے باز ختم ہوگئے کہ ہم ان ہی لوگوں کو واپس لارہے ہیں جنہوں نے پاکستان کرکٹ کا نام ڈُبایا ہے'۔

سابق کپتان نے مزید کہا کہ 'ہم داغدار کرکٹرز کو واپس لانے پر کئی مرتبہ نقصان اٹھا چکے ہیں لیکن ہم پھر بھی صرف ان کے ٹیلنٹ کی وجہ سے واپس بلالیتے ہیں'۔

رمیز راجہ نے مشورہ دیا کہ 'ہمیں اس معاملے میں کسی صورت بھی بے تاب نہیں ہونا چاہیئے اور ایسے کھلاڑیوں کو واپس لانے کے بجائے نئے ٹیلنٹ کو موقع دینا چاہئے تاکہ وہ سیکھ سکیں اور پاکستان کا نام روشن کرسکیں'۔

کوچنگ اسٹاف کو فارغ کرنے سے متعلق بھی انہوں نے کہا کہ یہ ایک بہادرانہ فیصلہ ضرور ہے مگر یہ بالکل درست فیصلہ ہے۔