نئی دہلی: بھارتی ٹیسٹ کرکٹر پرتھوی شا کا ڈوپ ٹیسٹ مثبت آگیا جس کے بعد بھارتی کرکٹ بورڈ نے ان پر 8 ماہ کی پابندی عائد کر دی۔

بھارتی بورڈ کے مطابق پرتھوی شا نے کھانسی کا سیرپ پیا جس میں ممنوعہ دوا شامل تھی۔ بھارتی میڈیا کے مطابق ڈوپ ٹیسٹ کے لیے ان کے نمونے 22 فروری کو لیے گئے تھے۔

بھارتی کرکٹر نے اپنے ٹوئٹر پیغام میں کہا کہ وہ پابندی کے باعث نومبر 2019 تک کرکٹ نہیں کھیل پائیں گے۔

pic.twitter.com/KXYHcUcBR0

— Prithvi Shaw (@PrithviShaw) July 30, 2019

ان کا کہنا تھا کہ جب وہ ممبئی میں اپنی مقامی ٹیم کے ساتھ تھے اس وقت انہوں نے کھانسی کا شربت پیا تھا جس کے باعث ان پر پابندی عائد کی گئی۔

انہوں نے دیگر نوجوان کھلاڑیوں کو پروٹوکول سے باہر جانے کے حوالے سے خبردار کرتے ہوئے بھارتی بورڈ کی اس حوالے سے سپورٹ پر شکریہ ادا کیا۔

19 سالہ نوجوان کرکٹر نے دو ٹیسٹ میچوں میں بھارت کی نمائندگی کی اور انہیں مستقبل کا بہترین ٹیسٹ بلے باز قرار دیا جا رہا تھا۔