حال ہی میں اپنی 37 ویں سالگرہ منانے والی بولی وڈ اداکارہ پریانکا چوپڑا ان دنوں سگریٹ کے ساتھ وائرل ہونے والی تصویر کی وجہ سے تنقید کی زد میں ہیں اور اب ان کی بہن پرینیتی چوپڑا نے بھی اس تصویر پر اپنا ردعمل دے دیا ہے۔

غیرملکی میڈیا رپورٹس کے مطابق گزشتہ دنوں پریانکا چوپڑا کی ایک تصویر وائرل ہوئی ہے جس میں انہیں اپنے شوہر اور ماں کے ساتھ دیکھا جاسکتا ہے۔

اس تصویر میں پریانکا چوپڑا سگریٹ جبکہ ان کے شوہر نک جونس اور ماں مدھو چوپڑا سِگار پیتے ہوئے نظر آرہے ہیں۔

یہ تصویر ان کی 37 ویں سالگرہ کے موقع پر لی گئی تھی جس میں وہ سگریٹ پی کر جشن منارہی ہیں۔

اس تصویر پر پریانکا چوپڑا کی بہن پرینیتی چوپڑا نے ردعمل دیتے ہوئے کہا ہے کہ اس بارے میں بولنے کا ان کا کوئی حق نہیں ہے۔

ایک تقریب میں جب ان سے یہ سوال کیا گیا تھا تو انہوں نے تبصرہ کرنے سے انکار کردیا تھا۔

واضح رہے پریانکا نہ صرف خود دمہ کی مریضہ ہیں بلکہ وہ دمہ کے خلاف چلائی جانے والی مہم کا حصہ بھی ہیں اور اسے لئے انہیں مداحوں کی جانب سے تنقید کا نشانہ بناتے ہوئے دوغلہ کہا جارہا ہے۔