نئی دلی: بھارت میں کانگریس کی صف اول کی رہنما اور لگاتار 15 سال تک دہلی کی وزیراعلیٰ رہنے والی شیلا ڈکشٹ 81 سال کی عمر میں مختصر علالت کے بعد جہان فانی سے کوچ کرگئیں۔

بھارتی میڈیا کے مطابق 1998ء سے 2013ء تک دہلی پر راج کرنے والی پہلی خاتون وزیر اعلیٰ شیلا ڈکشٹ دل کے عارضے میں مبتلا تھیں اور دو روز قبل طبیعت بگڑنے پر انہیں اسپتال میں داخل کیا گیا تھا جہاں آج دوران علاج وہ دم توڑ گئیں۔

Delhi: UPA Chairperson Sonia Gandhi, Priyanka Gandhi Vadra & Robert Vadra at Nigambodh Ghat where last rites of former Delhi CM Sheila Dikshit were performed, today. pic.twitter.com/XWlRZHtmBx

— ANI (@ANI) July 21, 2019

شیلا ڈکشٹ گزشتہ دو برس سے دل کے عارضے میں مبتلا تھیں اور پچھلے سال فرانس میں ان کی سرجری بھی ہوئی تھی اور صحت یابی کے بعد انہوں نے بھارت واپس آکر انتخابات میں حصہ بھی لیا تھا تاہم انہیں بی جے پی کے امیدوار سے شکست کا سامنا کرنا پڑا تھا۔

شیلا ڈکشٹ کے انتقال پر حکمراں اور اپوزیشن جماعت نے یکساں طور غم اور دکھ کا اظہار کیا ہے، کانگریس رہنماؤں نے شیلا ڈکشٹ کو ’تاحیات کانگریسی کارکن‘ اور ان کے دور کو روشن عہد قرار دیا جب کہ وزیراعظم مودی نے بھی دہلی کی تعمیر و ترقی میں ان کے کردار کو سراہا۔

اکیاسی سالہ شیلا ڈکشٹ کی آخری رسومات میں سونیا گاندھی سمیت کانگریس کی اعلیٰ قیادت اور وفاقی وزراء سمیت اعلیٰ حکومتی عہدے داروں کے علاوہ لوگوں کی بڑی تعداد نے شرکت کی۔ وہ حریفوں اور حلیفوں میں یکساں طور پر مقبول اور قابل احترام تھیں۔