کرکٹ ایک ایسا کھیل ہے جو شائقین اور کھلاڑیوں کو تفریح فراہم کرنے کے ساتھ ساتھ بے حد خطرناک بھی ہے، یہ کھیل اب تک کئی جانیں نگل چکا ہے جبکہ گزشتہ روز مقبوضہ جموں و کشمیر میں بھی ایک ایسا ہی حادثہ پیش آگیا ہے۔

غیرملکی میڈیا رپورٹ کے مطابق ایک مقامی کرکٹ میچ کے دوران گردن پر گیند لگنے سے 18 سالہ نوجوان کرکٹر جہانگیر احمد وار جاں بحق ہوگئے۔

بلے باز جہانگیر احمد وار نے میچ کے دوران ہیلمٹ سمیت تمام حفاظتی سامان پہنا ہوا تھا مگر گردن پر لگنے والی گیند ان کی جان لے گئی۔

جیسے ہی ان کی گردن پر گیند لگی تو وہ شدید زخمی ہوگئے جس کے بعد انہیں فوری طور پر قریبی ہسپتال لے جایا گیا تاہم اسپتال پہنچنے سے قبل ہی ان کی موت واقع ہوگئی۔

ڈاکٹرز نے بھی اس بات کی تصدیق کی کہ جہانگیر احمد وار اسپتال پہنچنے سے قبل ہی انتقال کرچکے تھے۔

مقبوضہ کشمیر کے گورنر ستیہ پال ملک نے جہانگیر کی موت پر گہرے رنج کا اظہار کرتے ہوئے لواحقین کیلئے 5 لاکھ روپے کی امداد کا اعلان کیا ہے۔

J&K Governor Satya Pal Malik has expressed grief over the death of Jahangir Ahmad War, an 18-year-old cricketer, who died while playing a cricket match in Anantnag district. He has announced an ex-gratia of Rs 5 Lakh to the next of kin of the deceased. (file pic) pic.twitter.com/2ikRoXGHhR

— ANI (@ANI) July 12, 2019

جمعہ کے روز ٹورنامنٹ کے باقی میچز کا آغاز ہونے سے پہلے مقامی کرکٹ کونسل کی جانب سے جہانگیر احمد وار مرحوم کے حق میں دعائے مغفرت اور 2 منٹ کی خاموشی اختیار کی گئی۔